“Harresi guztien gainetik, sarraila guztien azpitik” izenburua jarri diote gaur burutuko den ekimenari. Kartzelatik aurten iritsitako bertso, olerki eta kontakizun ezberdinen errezitaldiaren ondoren Xirimiri elkartean bertan afalduko dute ekimenean parte hartu dutenek. Nahi duten guztiei irekia dago afaria.
Gaur egingo den ekimenarekin, herritik urrun badauzkate ere herritarrekin lotura dutela eta herriko bizitzan presentzia dutela aditzera eman nahi dute antolatzaileek.
Hauek aurreratu dutenez, gaur arratsaldeko ekimena ez da ekintza isolatua izango, eta kartzeletatik testu gehiago iristen diren heinean beste bertso, kontakizun eta olerki errezitaldiak burutuko dira. Hori adierazi dute antolatzaileek, horrela, tarteka ekitaldiak eginez, elkarren berri izateko bide horri bizirik eutsiko zaio.
Presoen aldeko brindisa
Herriko preso politikoak ez ahazteko, urtero bezala abenduaren 24an Lasarte-Oriako preso politikoen senide eta lagunen ohiko brindisa antolatu zuten Okendo kalean. Jende ugari bildu zen bertan egun hauetan herrian egoterik ez duten lasarteoriatarrak oroitzeko eta ahazten ez dituztela erakusteko.
Ane Labaka herriko bertsolariak bertso batzuk kantatu zituen bildutako guztien aurrean eta Beñat Iriondok, hurbildutako guztiei eskerrak eman eta preso politikoen senideek egun hauetan bizi dituzten uneak ekarri zituen gogora, izan ere, Gabonak familiartean igarotzeko egunak diren heinean, eurek senide bat urruti dute eta.
Urteari agur
Urteko azken egunean ere Okendotik abiatuta Euskal Presoak eta Iheslariak etxera hurbiltzeko eskatuz hainbat lagunek herriko kaleak zeharkatu zituen. Hainbat lagun elkartu ziren abenduaren 31 arratsaldeko manifestazioan.