Dirulaguntzen banaketa
Dirulaguntzen gaiari helduz, irizpiderik gabe banatzen zirela salatu zuen udal gobernu berriak eta hau ekiditeko aurrerantzean neurriak hartuko zirela adierazi zuten ordenantza zehatz bat onartuz. Sozialistek lan hori eginda utzi dutela salatu nahi izan dute "aurreko legealdian diru laguntzen inguruko erreglamenduaren borradore bat aurkeztu eta onartu genuen, aplikatu besterik ez dute egin behar".
Bere garaian Somotoko laguntzak ikertzeko lanak martxan jarri zirenean, kooperaziorako diru laguntzak banatzeko irizpideak ezartzea ez ezik, gainontzekoak banatzeko pautak jartzea eskatu zutela azpimarratu dute sozialistek. Izan ere, dirulaguntzen inguruko legedia nahiko berria zen eta "ez zigun denbora eman beharrezkotzat ezartzen zen diru laguntzen inguruko ordenantza landu eta ezartzeko".
2008ko aurrekontua
Ekonomiari dagokionez, 2008. urteko aurrekontuarekin jarraitzea, herentzia larria zela azpimarratu zuten udal gobernuko ordezkariek. Honela, 2011. urtea bukatzeko Plan Ekonomikoa egin eta 2012. urteko aurrekontuan lanean ari direla aurreratu zuten. Sozialistentzat gezurretan ari dira, "guk 2010. urterako aurrekontua eginda utzi genuen, oposizioak ez zuen onartu eta bertan behera geratu zen baina hor dute gure lana". Datozen urtetarako aurreikuspenak jasotzen dituzten dokumentuak ere gobernu berriaren eskuetan daudela dio Jesus Zaballosek.
Hiribusaren gaia 2010.urteko aurrekontuarekin lotuta dago. Zerbitzuaren gastua 2010eko aurrekontuetan azaltzen zela azpimarratzen dute sozialistek, "baina hau beste udal taldeek onartu ez zutenez, ezin izan zen zerbitzua ordaindu. Ez zegoen horretarako aurreikusitako diru partidarik". Dena den, ordainketa eginda ez egotearen arrazoiak zeintzuk ziren jakiteko, alderdi sozialistarekin biltzeko eskaera egitea zutela adierazi du Zaballosek "edozein zalantza argitzeko prest gaude beti, ezjakintasunean oinarritutako gezurrik ez esateko eskatzen diogu gobernu berriari".