Lasarte-Oriako Udalean azken lau urteotan zinegotzi izan direnek azken aurreko batzarra egingo dute, gaur, goizeko 9:00etan, Somoton emandako diru-laguntzen ikerketari buruzko erabakia hartzeko. Ikerketa itxi egingo den ala ez erabakiko da gaurko batzar berezian.
Aurretik, Udaleko eta ikerketa batzordeko idazkari Xabier Ejeak egindako txostena eztabaidatuko da.
Idatzi honen arabera Ana Urchueguia alkate ohiaren jokabidean ez zen deliturik izan, legeak agintzen duenaren aurkako jokaerak egon zirela aitortu arren. Oposizioko alderdiek aldiz, kontrakoa uste dute, eta alkate ohiaren aurkako akusazio partikularra Udalak berak egin dezala eskatzen dute.
Somotora bideratu ziren diru laguntzetan irregulatasunik egon zen eta Ana Urchueguia alkate ohiaren gobernuak zuzen jokatu zuen jakiteko Udalean sortu zen ikerketa batzordea aurreko ostegunean bildu zen eta Xabier Ejea idazkariak egindako txostena onartu egin zuen PSE-EEk duen gehiengoari esker. PP abstenitu egin zen eta EAJ, Plataforma , Ezker Batua eta Ezker Abertzaleko zinegotziek kontrako botua eman zuten.