Hamarretan zegoen jarria zita eta jende askok erantzun zion Ostadarrek eginiko deialdiari. Batez ere haurrak eta hauen gurasoak ikus zitezkeen motxila, kantinplora eta ogitartekoa hartuta, baina adin guztietako jendea iritsi zen helmugaraino. Bejondeiela.
Ibilbidea
San Pedro elizan hasi, Andre Joakineneako aldapa igo eta Martin Berasategi aurretik pasatuta, Plazaolako trenaren bidea hartu zuten lehenik.
Ondoren, Azkorte bideko bidegurutzea hartu eta behin Azkorteko ermitara iritsita, pixka bat gorago igo behar izan zuten mendizaleek Andoain markatzen zuen gezitxoa ikusi arte. Azkenik, Andoain aldera jaitsi ziren harrobiaren ondotik igarota eta bertako udaletxean amaitu zen bidaia.
Lokatzetan barrena
Eguneko protagonista berezia, lokatza izan zen. Azkortera igotzeko bidea, ohi bezala, nahiko lokaztuta zegoen eta zenbaitek laprast egin edota bidean oinetakoa galdu zuen. Dena den, ez zen inolako ezbeharrik izan. Hori bai, botak garbi eraman zituenak, erabat lohituta bueltatu zituen etxera.
Andoain, helmuga
Aurpegi alaiak, irribarrea, kantua… Izan ziren nagusi Andoainera iristean, baita herrira bueltatzeko antolakuntzak jarritako bi autobusetan ere (batean ezin izan zituzten denak sartu).
Bi ordu eta laurden inguruko ibilbidearen ostean, sagarra eta ura izan zituzten mendizale guztiek Andoaingo kontrol puntuan. Gainera, txikienek kamiseta bat jaso zuten opari.