10_“Gatazkatan guraso eta irakasleek batera jardutea funtsezkoa da”

jon-altuna-iza 2012ko ots. 10a, 01:00
Haur edo nerabeen inguruan gertatzen diren gatazkei, hauen konponbideari eta erantzun egokia emateko tresnei buruzko tailerra zuzenduko du otsaila eta martxoan Landaberri ikastolan eta institutuan GEUZ Gatazka Eraldatzeko Unibertsitate Zentroko Lucia Gorbeña koordinatzaileak. Ikastolan ondo ezagutzen dute bera 2005-2006 ikasturtean etorri zen eta lehenengo aldiz. GEUZ arduratzen da ikastolako bizikidetza plangintzaz eta nahiko garatua daukate.
Landaberri ikastola eta institutuak antolatu dute elkarbizitzaren eta gatazken konponbideari buruzko topaketa bi ikastetxe hauetako irakasleei eta gurasoei zuzendurik. Astelehenean Landaberri ikastolako irakasleekin hasi zen ikastaroan, "irakasle eta gurasoen arteko harremana hobetzeko gako eta estrategiak" gaia jorratuko dute.
Lucia Gorbeña adituaren ustez, funtsezkoa da bien arteko lotura eraginkorra, "arazoak edo bi aldeen jarduna eskatzen duten egoerak daudenean bi aldeek jokabide berbera izan dezaten. Koordinatuak baldin badaude eta elkarri laguntzen badiote emaitzak ere hobeak izango dira ikaslearen hezkuntza integrala lortzeko helburu horretan".