Jalgin, Bluestock
Zarautzetik etorri zen “Bluestock” taldea, eta izenak dioen bezala, blues eta rock´and´roll doinuak izan ziren nagusi ostiraleko kontzertuan.
Euskarazko abesti propioak ingelesezko bertsio klasikoekin uztartu zituzten emanaldia ikustera joan zen jendearen gozamenerako.
Abend-en, Rise To Fall
Kontzertu paregabea eskaini zuen Rise To Fall talde entzutetsuak. Bizkaia aldetik etorritako boskoteak maila oneko deth-metal kontzertua eskaini zuen ostiral gauean Abend kafe antzokian eta ikusleek kalitatezko musika kontzertu bat dastatu ahal izan zuten.
Herriko jende asko bazegoen arren, nabarmentzekoa izan zen kanpotik etorritako musika-zaleen kopuru altua, Euskal Herri, Espainia zein nazioartean arrakasta handia baitu Rise To Fall-ek.
Apirilaren 9an aurkeztu zuten euren azken diskoa, "Defying the Gods”, eta ostiraleko kontzertua kantu berriak jendaurrera eramateko baliatu zuten, berriki Japonian izan baitira bira egiten.
Rise To Fall-en aurretik, Lion Head talde urnietarra izan zen oholtza gainean.
Hareazko ipuinak
Minbiziaren gai korapilatsua landu zuten larunbateko antzerkian. Haurra gaixo duen aitak txikitxoari poztasuna eta bizitzarekiko duen filosofia baikorra igorri zizkion.
Txotxongilo eta zuzeneko musikaren bidez, duintasunez jorratu zuten minbiziaren gaia.