Maratoiak eta leloak
Lehen esan bezala I. Maratoia 1986an egin zen urriaren 25 eta 26an 40 ordu baietz! lelopean. Hurrengo Maratoia 1988an izan zen 40 ordu berriz! leloarekin maiatzaren hasieran.
Geroztik Maratoiak lau urtetik behin ospatu dira. 1992ko azaroan izan zen III. Euskararen Maratoia, 40 ordu? Errex! leloarekin. IV: Maratoia berriz, urriaren bukaeran ospatu zen 40 ordu gogoz!. Hemendik aurrera Maratoiko leloak aldatu egin ziren eta data nolabait finkatu, urriaren amaierarako utziz festa. Hasieran leloek zuten erronkaren kutsua desagertu egin zen, garbi geratu baitzen 40 orduz, Lasarte-Oriako euskaldunak euskaraz etengabe egiteko gauza direla. Horrela, 2000ko urriaren bukaeran ospatu zen V. Maratoiko leloa Eguneroko plazerra izan zen; 2004ko VI. Maratoikoa berriz, Bero-bero euskaraz orain eta gero. VII. maratoiarena Korritzeko modukoa.
Aurtengo Maratoia zortzigarrena da, eta urriaren 20an goizeko 08:00etan hasi eta 21ean amaituko da gaueko 12etan. Badira bizpahiru hilabete Maratoiaren Batzordea osatu eta lanean hasi zela. Antolatzaileek ez dute sorpresarik aurreratu nahi izan, biharko prentsaurrekorako dituzte gordeta. Beraz zortzikotea nork osatuko duten, zein izango den leloa, logoa, irudia, kartela... Guzti honen berri esan bezala, bihar arratsaldeko 7etan Villa Mirentxun.