Nogales-ek jakinarazi zuen lehenengo urratsak auto-eskolek zerbitzuak euskaraz emateko behar zituzten bitartekoak, liburu multimedia eta beste eskura jartzea izan zela, gaur egun Buruntzaldeko herri guztietan dagoela atal teoriko euskaraz egiteko aukera, baina oraindik alde handia dagoela azterketa gazteleraz egiten dutenekin alderatuta.
Horregatik eusten diote eskualdeko Udalek kanpaina honi. 18 urte aurten beteko dituzten gazte guztiei bidaltzen diete informazioa, eta auto eskola bakoitzeko ikasle batek atal teorikoa dohainik izango du. Gehienez 400 euroko sari baten zozketa egingo da gida baimena euskaraz atera dutenen artean urtearen amaieran.
Joxean Bengoetxea Gipuzkoako autoeskolen elkarteko buruak interesgarritzat jo zuen egitasmoa eta bere iritziz garrantzitsua da erakundeen laguntza ugaritzen ari baita azterketa euskaraz egiten dutenen kopurua, “ohiturarengatik” gazteleraz egiten dutenak oraindik gehiago diren arren.
Aurrera begira zer eginak badaudela argi geratu zen aurkezpenaren amaieran, Bengoetxeak atal praktikoa ere euskaraz egiteko bidea irekitzen ari direla esatean.