Buenetxea eta Txindokiko jokalariek elkarrekin atera zuten talde argazkia, eskutan ikurrina eta garaikurrak zituztela.
Ostadar SKT-k 2012an antolatu duen XIX. Areto Futbol txapelketa larunbatean amaitu zen. Emozio eta tentsioz betetako final eder baten ostean, Buenetxea izan zen garaile jendez lepo zegoen kiroldegian.
Ligaxkako finala
Trumoi eta Naiban iritsi ziren ligaxkako finalera eta bigarren honek 4-1eko emaitzarekin gailendu zuen Trumoi.
Lagunarteko partidua
Behin ligaxkako finala amaituta, Jalguneko lagunek eta Trumoi taldeak lagunarteko partidu ikusgarria jokatu zuten final handiaren atarian.
Jalguneko jokalariek areto-futbol txapelketan maila ona emango luketela argi eta garbi utzi zuten euren gol eta geldiketen bidez.
2012ko kirolari onenaren saria David Martinek jaso zuen eta Auzolan saria berriz, Jalgune elkarteko begiraleentzat izan zen.
Auzolan eta kirolari onena
Ostadarrek omenaldi txiki bat egin nahi izan zien David Martin eta Jalguneko begiraleei. Lehenari kirolari onenaren saria eman zioten bere kirol ibilbide oparoagatik eta Auzolan saria berriz Jalguneko begiraleentzat izan zen pertsona ezinduekin egiten duten lan guztia eskertu asmoz.
Txapelketako sarituak
Arratsaldeko garaile bakarra ez zen Buenetxea izan, txapelketako jokalari onena Garikoitz Zurriarain (Buenetxea) izendatu baitzuten, atezainik onena Jokin Alaña (Txindoki) eta txapelketako golegile nagusia Lander Castro (Balerdi) izan baitziren.
Finaleko jokalari onena berriz, Javi Calvo (Buenetxea) izendatu zuten. Sari guztiak Pablo Barrio herriko alkatearen eskutik jaso zituzten.