Herriko muslariek arratsalde pasa polita egin zuten elkarri enbidoka.
Museko final handia
Azken bi hilabeteotan, izena eman duten 34 bikoteen artean onenak izan direla erakutsi dute Mikel Chanca eta Jose Carlos Palomares zein Gorka Amantegi eta Agus Egañak osatutako bikoteek. Finalean, azken hauek atera ziren garaile, 2-1 puntuko emaitzaz.
Lehen puntua lehiatua izan zen, 4-3 geratu baitziren partidei dagokienez, eta azkenan Egaña eta Amantegik eskuratu zuten lehen puntu baliotsua. Bigarrena, erraztasunez irabazi zuten Palomares eta Chancak, 1-4ko emaitzaz. Hirugarren puntu erabakigarria borrokatua izan bazen ere (4-3), Amantegi-Egaña bikotea izan zen garaile partida luze baten ostean.
I. Patata tortila lehiaketa
Musarekin nahikoa ez, eta herriko ostalariek patata tortila lehiaketa antolatu zuten larunbatean. Denera, 11 hautagai aurkeztu ziren eta herriko tabernetako hiru sukaldarik egin zituzten epaile lanak.
Azkenean, Mar Lojok irabazi zuen, epaimahaiak bere amak Galiziatik ekarritako arrautza eta patatekin egindako tortila onena zela iritzita.
Sari-banaketa amaieran
Arratsaldea tenore onean amaitzeko, sari-banaketa egin zuten. Ardoa, makilak, kapelak, kopak, txanpaina... denetik eraman zuten irabazleek etxera eta bapo jarri ziren lehiaketara aurkeztu ziren patata tortilak jaten.
