Santi Lorenzo herritarra gertu ibili den arren, eta aurtengo garailea Muñoz-Baroja izan da, merezimendu osoz gainera.
Final bizia eta estua
Lorenzo herritarrak gogor ekin zion finalari, era ikusgarrian, baina Muñoz-Barojak lehen set-a irabazi zuen “break” bat egin ostean.
Bigarren set-ean, Muñoz-Baroja moralez gainezka zela eta Lorenzo arreta galduta, 4-1 aurreratzea lortu zuen donostiarrak. Halere, Lorenzok ez zuen azken hitza esan oraindik, eta 4-4 jarri ziren.
Set-a tie-break bidez erabakiko zela zirudienean, Muñoz-Barojak sakea hautsi zion Lorenzori eta 7-5 nagusitu zen set-a, partidua eta txapelketa eskuratuz.
3. postua Ramosentzat
Finala bezain interesgarria izan zen 3. eta 4. postuak erabakitzeko partidua. Azken emaitza, 6-4 / 4-6 eta 7-5 izan zen Raul Ramosen alde. Bi ordu eta erdiko partidu luze, gogor eta lehiatua jokatu zuten Hernandez eta Ramosek.
Hernandez elgoibartarra hirugarren setean 2-5 aurretik jarri bazen ere, ezin izan zuen partidua itxi eta azken unean Ramosek bere aukera apurretan sinetsi eta partidua irauli ahal izan zuen 7-5eko emaitzaz hirugarren set-a eta partidua irabazteko.
Merendola eta sariak
Ostiraleko bi partiduak bukatuta, sari-banaketa egin zuten Pablo Barrio alkatea eta Taxio Arrizabalaga kirol zinegotzia bertan zirela.
Garaileak irabazi izanaren pozez eta galtzaileak gehiago ezin izanaren penaz geratu baziren ere, izerdia bota ostean indarrak errekuperatzeko parada eduki zuten. Izan ere, merendola eder bat egin baitzuten ikusle, tenislari eta antolatzaileek, denek batera.
Hori gutxi balitz, ikusle, jokalari eta pilota-jasotzaileen artean erraketak, bixerak, tenis-pilota poteak, koloniak, irrati-aparailua eta oro har, tenisarekin zerikusia duen materiala zozkatu zuten bi partiduak amaitzean. Bat baino gehiago irribarre zabalarekin joan zen etxera opariak eskutan hartuta.
Antolatzaileak gustura
Alex Zubizarretak eskerrak eman nahi izan zizkien txapelketan parte-hartu duten tenislari guztiei, partiduak ikustera hurbildu den jendeari eta txapelketa ekonomikoki sostengatu duten hainbat enpresa eta marka pribaturi.
Hurrengo urtean berriro ere txapelketa antolatzeko “gogo eta ilusioz” mintzatu ziren antolatzaileak.