Nola da posible 2011n korrikalari batek 63 lasterketan parte-hartzea urteak 52 aste dituenean?
Ba asteburuetan bitan korrika egiten eta lasterketa batzuk entrenamedu modura hartzen, ezin baita denetan topera joan txiki-txiki eginda bukatu nahi ez baduzu behintzat.
Non egiten dituzu lasterketak, Euskal Herrian, Estatuan...?
Orokorrean Euskal Herrian, gehienbat Bizkaia eta Gipuzkoan, nahiz eta Euskal Herritik kanpo ere egin dudan lasterketaren bat.
Ez al zaizu neke psikologikori pilatzen?
Ez, normalean gustura joaten naiz, gehiago kostatzen zait entrenamendu markatuak ditudan egunetan ateratzea, serieak etab. egitea adibidez.
Nola egiten zaio aurre hilabete honetan bertan bukatu duzun Aralar eta Aizkorri mendizerrak zeharkatzen dituen G2H 88km-ko mendi ultra-lasterketari?
Lasterketa batzuk espezifikoki prestatu behar dituzu. Kilometro asko dira, bakardadea, gaua... Batez ere moral asko behar da, baikorra izan behar duzu uneoro, momentu zail asko izaten dira eta etsitzeko gogoa gailendu daiteke halako lasterketa luze eta gogorretan. Aurten nire denbora ordu eta erdian hobetu dut eta beno, gustura nabil oraingoz.
Ba ala duzu lasterketa kuttunik?
Goierriko bi handiak (G2H) eta Arratzu-Urdaibai mendi-lasterketak, Donostiako triatloia eta Behobia ezin ditut galdu eta etxekoa noski, Lasarte-Oria Bai! Kross herrikoia.
Aurten gainera, Kirolprobak-ek oparitu dizkidan 10 lasterketa aukeratu behar izan ditut... Bestalde sortzen diren karrera berriak probatzea ere gustatzen zait...
Mendi lasterketa tekniko eta zailak nahiago dituzu? Ala errazak eta azkar egitekoak?
Teknikoak nahiago, izan ere indar gutxi daukat hanketan, baina palan aritu izan naizenez, erreflexuak mantentzen ditut oraindik aldapa behera moldatzeko. Harri artean ibili eta saltoka aritu behar bada, hobe niretzat. Hor aurreratzen dut jendea, zati zailenetan. Hala ere proba gehienetan atzeko partean ibiltzen naiz, ez pentsa...
Zein da zure entrenamendu gunea?
Andatzan entrenatzen dut gehienbat, baina ez bakarrik hor. Konpletoa da, pista zabalak, bide estuak, lokatz guneak, harriak... denetik daukazu, leku ona da trebatzeko. Gainera orain erosi dudan GPS berriarekin edozein lekutan ibil zaitezke galdu gabe.
Lasterka aritzeaz gain, triatloiak ere egiten dituzu. Bateragarriak al dira muskularki?
Ura-bizikleta-korrika aldaketak oso gogorrak dira... Baina korrika asfaltoan bakarrik ibiliz gero, belaunak lesionatzeko arriskua dago. Aldatzea ona da, mendia, bizikleta, igeriketa... txipa aldatu behar da noizbehinka, eta azkenean kirola egiten ari zaranez, ez duzu sasoia galtzen.
Halere, astean hirutan igeriketa Buruntzaldea IKT taldearekin egiten dut, masterrekin. Serioxeago entrenatzen hasi gara, izan ere askotan ez diogu igeriketari zor zaion garrantzia ematen. Kirol konplikatua da igeriketa eta bere orduak eskatzen ditu.
Aukeratu beharko bazenu, zer duzu nahiago, mendia, igeriketa, bizikleta, asfaltoan korrika egitea...?
Azken bolada honetan gehiago ari naiz disfrutatzen mendian, nire azken erronka gogorrenak mendian izan direlako eta hor prestatu behar izan dudalako. Triatloian ere oso gustura ibiltzen naiz, nahiago ditut luzeak, ez baitaukat explosibitaterik. Aukera gehiago ditut ondo ibiltzeko distantzia luzeetan, diesela naiz.
Lasterketa batean sufrimendua soilik ikusten baduzu, etxea geratzea onena. Beti dago zure gorputzarekiko erronka bat, tokiak ezagutu, jendearekin erlazionatu...
Pultsometroarekin entrenatu edo konpetitzen duzu?
Boladak izaten ditut. Ez zait gehiegi gustatzen lasterketetan begira joatea, estresa eragiten dit. Gainontzean ondo erabiltzen ikasten baduzu, zenbait entrenamendu espezifikotan oso erabilgarria da.
Lana eta kirola uztartzeko arazorik bai?
Goizez egiten dut lan Donostian atezain bezala, primeran datorkit beraz ordutegia. Neguan arrabola edo iraupen eskia egiten ditut. Azken finean, barazkiekin bezala, denboraldian denboraldiko kirola egiten dut.
Zer nolako giroa duzue Ostadar taldean?
Nik denbora gutxi daramat, baina jende asko dabil taldean. Lasterketak egin ahala joan naiz taldekideak ezagutzen.
Zein gomendo emango lieke zu bezalako lasterkari beterano batek, korrika egiten hasten denari?
Nik berez denbora gutxi daramat, urte gutxi batzuk, beraz aholku asko ezin eman. Baina erronka zailegiak ez jartzea esango nieke. Lehenik eta behin mediku-azterketa egitea gomendatzen dut, nola zabiltzan ikusteko, zure pultsazioak zein diren jakiteko, pixkanaka joatea funtsezkoa da, eta gustatzen bazaizu aurrera. Parrandak botatzea ez dut gaizki ikusten, noizbehinka egin behar dira.
Zertan eta zenbat aberasten zaitu kirolak? Merezi al du hainbeste sufrimenduk?
Berez lasterketa batean sufrimendua bakarrik ikusten baduzu, etxea geratzea onena. Beti dago zure gorputzarekiko erronka edo motibazio bat.
Gogorra zuretzat bakarrik ez, senide eta ingurukoek ere jasan beharko dute zure zaletasuna ezta?
Beno, egia da batzuetan etxean baimena behar izaten dudala lasterketetara joateko, baina oraintsu nire neska ere korrika hasi da eta gustura dabil. Gainera lasterketak goizez badira, eguerdirako etxean zaude eta eguna aprobetxatu dezakezu oraindik.