Zu” izenburua duen amodio bertso sortarekin irabazi du Ane Labakak Basarri Saria
Ostiralean gaueko 22:00etan jokatuko da Lizardi bertsolari gazteen txapelketako finala Zarauzko Zinema pilotalekuan eta ondoren kantatuko dira Ane Labakaren 10 bertsoak. Finalean izango dira Anerekin Lasarte-Oriako bertso eskolan aritzen diren Beñat Iguaran amasarra eta Unai Gaztelumendi añorgarra. Hauekin batera Manu Goigana oiartzuarra, Aritz Casabal pasaitarra, Aitor Urbieta eta Oier Aizpurua zarauztarrak iritsi dira finalera. Hiruna bertso kantatuko dituzte ofizioka zortziko txikian, zortziko nagusian eta hamarreko txikian, bina punturi erantzun eta bukatzeko kartzelako lana egingo dute bakarka, gai batekin hiruna bertso neurri eta doinu librean.
Ane Labaka bapatean ere aritzen da bertsotan, Gipuzkoako txapelketako final laurdenetan izan zen iaz eta nabarmendu daiteke Udarregi eta Plazatik Gaztetxera sariak ere eskuratu zituela Usurbil eta Mutrikun. Bertso papererei dagokionez, hainbat sari jaso ditu Ane Labakak, orain artean garrantzitsuena 2010eko Xenpelar saria. 1.200 euroko Basarri saria irabazi duen “Zu” bertso sortako bi bertso ezagutarazi dira momentuz:
Izan nahi dut ilunpean / zure argi seinalea, / paradisura daraman / hiri bateko kalea, / hare erlojutik jausten / den azken hondar alea, / zuregana energia / daraman eroalea, / maitasun dosiak behar / dituen drogazalea, / aldi berean izanez / emailea, eskalea, / zure lagunik onena / eta zure maitalea. / Ez dut nahi goizez ohera / ekartzea gosaria, / ez larrosaz betetzea / nire etxe ataria, / urteurren bakoitzean / jasotzea oparia, / soka lodi bihurtzea / lotzen gaituen haria... / begiak itxiko ditut / egin dezazun magia / eman zaidazun muxu bat, / sentitua, jostaria, / ta esan dela ematen / didazun azken aldia.