Ezezagutza horrekin amaitu nahi da eta mendi hau behar bezala ezagutzera eman nahi da lasarteoriatarren artean Euskararen Maratoian. Hain juxtu arrazoi hau tarteko Ostadarreko mendi taldeak Euskararen Maratoiaren baitan antolatu nahi izan ditu Benedikara igoerak eta behar bezala ezagutzera eman gurean dagoen txoko polit horietako bat.
Lasarteoriatarra
Buruntzaren itzaletan bizi izan da beti Benedika eta garai batean behintzat bazen Buruntzara igotzeko honetatik pasatzen zen ibilbidea. Mendizale askok hau igotzen zuten Buruntzarako euren ibilbidean baina egun guztiz ahaztuta dago. Benedikak badu inguruko mendiek ez duten ezaugarri garrantzitsu bat; Lasarte-Oriako eremuaren baitan kokatuta dagoen mendi bakarra da.
Izan ere, Buruntza bera Urnieta eta Andoainen eremutan kokatzen da eta Teresategiren magala ere Donostiako eremuaren barruan dago.
Benedika mendiak 223m-ko altuera du eta Zapal baserriaren ondoan kokatzen da. Benedika izenari dagokionez, herriko toponimia berreskuratzeko ahaleginean kartografiatan agertzen den jatorrizko izena da. Izen hauek zaindu eta bultzatzea du helburu herriko mendizale taldeak ere. Honen jatorria ordea, askoren jakin mina piztu arren, ezin zehazki jakin.
Ehiztarien mendia
Hala ere, gehienentzat ezezaguna izan arren badira Benedika ondo ezagutzen dutenak eta horiek herriko ehiztariak dira. Bertan kokatzen dira herrian oraindik geratzen diren ehiza postu bakanak. Hala ere ehizarako gunea izateaz gain, herriko behatoki ezin hobea da eta merezi du hau ezagutu eta eskaintzen duen paisaiaz gozatzea.
Bereziki politak izango dira gauez egingo diren txandak. Hauetara noski antolakuntzatik linternak eramatea eskatzen da eta ekintza honetan parte hartuko duten guztiei, mendiko zapata aproposak ekartzea eskatzen zaie. Nahiz eta mendi zaila ez izan, erosotasuna beharrezkoa da halako txangoa behar bezala egin ahal izateko.
Bide erraza
Mendia izaki, honen igoerari erreparatu behar zaio. Benedikara igotzeko bidea erraza da azpimarratu moduan.
Gehiena bide asfaltatuetatik egiten da azken zatia izan ezik eta joan etorria, lasai ibilita, ordu eta erdian egiteko modukoa da.
Paseo polita eta guztiz aproposa mendian ibiltzeko ohiturarik ez dutenentzat zein haurrentzat.
Lehen igoera, 8:30ean izango da larunbatean, urriak 20, eta Ostadarreko kideek egingo dute tontorrean buzoia jartzeko. Ondoren, beste 25 txanda daude aurreikusiak.
Maratoian zehar txangoak Okendotik abiatuko dira eta Kotxeras inguruan Oztaran eskola aldera hartuko da espaloia. Behin hara iritsita, eskolaren atzetik ateratzen den bidexka bat jarraituta Garratzako aldapan gora egin eta azken bidexka batek zuzenean eramango ditu mendizaleak tontorreraino.
Egun Benedikara igotzeko bidea ez dago behar bezala adierazita eta Maratoiko txango hauek ere horretarako baliatuko dira. B baten bidez bidegurutzeetan hartu beharreko bidea markatuko da inor gal ez dadin. Marka hauek ez dira Maratoiaren ostean kenduko, bertan utziko dira herritarrak mendixka hau ezagutzeko aukera ere Euskararen Maratoiaren ondoren izan dezaten.
Izena ematea
Benedika da Maratoiko ekintza nagusietako bat. www.euskararenmaratoia.com helbidean sartu direnek ikusi moduan, Udaletxe berrira egingo diren bisita gidatuekin batera.
Benedikara igotzeko, txandak aukeratu daitezke dagoeneko. Izena emateko, aurreratu genuen moduan aurten hiru modu daude, on-line egin daiteke www.euskararenmaratoia.com helbidean sartuta, Ttakuneko egoitzatik pasata edo 943 376 858 zenbakira deituta. Animatu eta izena eman Lasarte-Oriako talaia hau ezagutzeko!