Kirol guneko areto-futboleko pistan herriko taldeen arteko partidak ikusi ahalko dira.
30. edizio honetan 14 talde lehiatuko dira eta Imanol Azkuek txapelketako ordezkariak azaldu digunez ez da talde berririk izango, nahiz eta batzuk izenez aldatu diren.
Honela Indaux, Balerdi Harategia,Txindoki, ISU Leihoak, El Punto taberna, Ana eta Soi ileapaindegia, Albañileria Vertical, Trumoi taberna, Izarra bitxitegia, Oria kristaldegia, Ilargi taberna, Buenetxea taberna, Urdaneta Hortz Klinika eta Izkiña taberna izango dira aurten txapelketan parte hartuko duten taldeak.
Hauen artean, noski, iazko garailea Buenetxea eta bigarren sailkatua Txindoki aurkitzen dira.
Lehenengo fasea
Txapelketako antolatzaileek azaldu digutenez, ohi bezala txapelketak bi zati izango ditu.
Batetik, lehenengo fasea izango da. Hau liga formatuan jokatuko da, hau da, guztiak guztien aurka eta talde kopurua dela eta, itzuli bakarrera izango da.
Partida guztiak Michelingo kirol gunean jokatuko dira ostirala arratsalde eta larunbata goizetan. Aste honetako partidak kirol agendan ikus daitezke.
Final handia
Lehen fase honetako zortzi lehenak play-offerako sailkatuko dira eta kanporaketa sistema erabiliz, maiatzean jokatuko den finalerako txartela bilatuko dute. Gainontzeko taldeek ligaxka jokatuko dute.
Txapelketako antolatzaileek herritarrak animatzen dituzte partidak ikustera.