Oskar Benas bakarlari iruindarrak kontzertu goxoa eskaini zuen ostiral iluntzean Orbela loradendan. Artista denda barnean kokatu eta ikusleak erakusleihoaren beste aldean jarrita, bertatik pasatzen zen jendearen arreta piztu zuen. Publikoak gustura entzun zituen Muguruza Kontrabandan eta Maika Makovskin aritua izan den musikariaren doinuak.
Bestalde, Kultur Kale zikloaren barnean hau ere, Orto Rock festibala izan zen larunbatean Siglo XX tabernan. Bertan herriko Keep Diggin, Sony Crocket, Human Disaster eta zarautzetik etorritako Pinotxet aritu ziren Orto Brothers DJ-ekin batera arratsaldea eta gaua eta girotzen.
Su txikian, hausnarketako
Euskal Herriak azken hamarkada honetan bizi izan dituen jira-bira politikoak eta elkarrizketa ezberdinen inguruan diharduen “Su txikian” antzerkia ikusteko aukera izan zen Manuel Lekuonan.
Txillarre baserrian izandako elkarrizketa sekretuetatik hasita, Aieteko konferentziara iritsi bitartean izandako atxiloketak, atentatuak, lider politikoak, ETAko buruzagiak, elkarrizketen adostasun eta desadostasunak taularatu zituzten “Glu glu” produkzioen eskutik.
Jendearen erantzuna ona izan zen, eta 140 bat lagun bildu ziren antzerkia ikustera.
Galder Perez zuzendariak antzerkia osatzeko oinarritzat honako liburu hauek hartu ditu: Imanol Murua Uria kazetariaren “Loiolako hegiak”, Arnaldo Otegi ezker abertzaleko kidearen inguruan diharduen “El tiempo de las luces” eta Jesus Egiguren PSE-ko politikariaren hitzekin osatutako “ETA. Las claves de la paz”.