Musikariak kalejiran aterako dira gaur

Txintxarri Aldizkaria 2012ko azaroaren 20a
Deskargatu Info Ahotsak :
Español English Français Català Galego

Lasarte-Oriako Udal Musika eskolako lagunek Santa Zezilia ospatzeko 18:30etatik aurrera kalejira handia egingo dute herriko plaza eta kaleak musikarekin alaituz. Bertara gerturatzeko animatu nahi dituzte herritarrak.

2010ean Manuel Lekuonan egin zuten emanalditxoa ikasleek.
Lasarte-Oriako Udal Musika eskolako lagunek Santa Zezilia ospatzeko, 18:30etatik aurrera kalejira egingo dute herriko kaleetan barrena. Musikari hauen lehenengo notak Manuel Lekuona Kultur Etxeko aterpean entzungo dira. Ondoren, Geltoki kaletik Okendo plazarantz abiatuko dira. Bertan, Euskal Herriko Musika Eskolen Elkarteak egun hau ospatzeko propio Musika Eskola guztientzat idatzitako “Musikalean” interpretatuko dute. Musika Hizkuntzako ikasleak arituko dira kantari.

Lehenengo geldiunearen ondoren, San Pedro parrokiara joan eta bigarren saiotxo bat han egingo dute. Eta bukatzeko, berriro Manuel Lekuona Kultur Etxera joango dira. Musika eskolako arduradunek jakitera eman dutenez kalejira hau prestatzen, ikasle eta irakasleak irailetik aritu dira buru belarri. Era berean, euria egingo balu, prestatutako kantak Manuel Lekuona Kultur Etxeko aterpean interpretatuko lituzketela adierazi dute.