Arratsaldean Loidi-Barreneko pilotaleku ingurura iritsiko dira Olentzero eta Mari Domingi 17:00ak inguruan eta handik abiatuko da minutu batzuk beranduago Okendo plazara. Ordu erdiko kalejiraren ondoren Okendon egongo da Olentzero, Mari Domingi, Xixuko eta Porrotx-ekin batera urtero bezala haurren muxuak eta gutunak jasotzen.
Giro eta musika ez da faltako plazan 18:00etatik aurrera Alboka abesbatza eta Amalur trikitixa eskolako neska mutilak jardungo baitira, Bertso Eskolako gazteekin batera. Gabon, kantak, musika, bertsoak... Olentzerori harrera beroa egiteko.
Arratsaldean Alboka abesbatza ere Atsobakar zaharren egoitzan hasi eta herriko kaleetatik barrena ibiliko da kantuan. Bestalde, baserriz baserri kantatuko dute Erketz Euskal Dantza Taldekoek. Beraz jai giroa herriko etxe, baserri eta txoko guztietan zabalduko da egun osoan zehar.