Ekintzaz beteriko eguna izan zen urtarrilaren 5a Errege Magoentzat. Goizean goiz, Atsobakarreko zaharren egoitzara joan ziren herriko adinduak bisitatu eta opariak zein musuak banatzera. Eguerdian pajeak bidali zituzten Okendo plazara haurren gutun eta marrazkien bila eta bertan, MEGABA elkarteak antolatutako marrazki lehiaketako sariak banatu zitzaizkien Pablo eta Ander Garrido anaia irabazleei. Arratsaldean herriko kaleak zeharkatu zituen kabalgata egin zuten Erregeek eta egun neketsua amaitzeko, etxez etxe ibili ziren opariak eta ilusioa lau haizetara banatuz.
Poz handiz bizi ohi dute Errege bezpera eguna herriko gaztetxoenek, baina helduenek ere modu berezian gogoratu eta maitatzen dute Errege kabalgata, txikitako oroitzapenetara atzera-jauzia egiteko aukera ematen baitie.
MEGABA elkarteak hartu du kabalgata antolatzeko ardura eta jendearen erantzuna primerakoa izan da. Urtero bezala borrokan aritu ziren herritarrak karamelu gehien nork hartuko eta antortxeroek urteroko ukitu mistikoa eman zioten arratsalde magikoari.
Ibilbideari dagokionez, Oriatik atera eta Zumaburuko zaharren egoitzan eta Brijidatarren komentuan geldialditxoa egin ostean, Okendon bi eskutitz irakurri zituzten udaletxeko balkoitik jendez gainezka zegoen plazaren aurrean.
