Villa Mirentxun izango da hirugarren batzarra ere.
Lasarte-Orian larunbatean egingo da hirugarren bilera eta antolakuntza eredua eta funtzionamendua izango dira eztabaidagai. Bertan landuko dira barne bizitzari dagozkion gaiak, barne mailako demokrazia parte hartzailea, euskararen lehentasuna edo egituraren parekidekotasuna eta baita militantzia motari dagozkionak. Gainera, herrietako, herrialdeko eta nazio mailako egiturei buruz ere hitz egingo da eta Lasarte-Oriako antolakuntzaren inguruan eztabaidatzeko parada izango da. Ildo politikoaren txostenari egindako emendakinak ere bozkatuko dira.
Balorazio positiboa
Batzarren balorazioa positiboa da sustatzaileen arabera. “Bilera hauen metodologia berritzailea izan da, parte hartzeari eman zaio garrantzia eta talde txikietan eztabaidatu da gai ezberdinen inguruan. Oinarri ideologikoari dagokionez, sozialismoa, feminismoa edo euskara tratatu dira eta ildo politikoari dagokionean, independentzia eta sozialismoaren bidea, euskal langile herriak duen betekizunaz besteak beste”.
Otsailaren 23an Sortu talde politikoaren sorrera ekarriko duen I. kongresua egingo du ezker abertzaleak.
Larunbatekoa batzar irekia dela gogoratzen dute eta parte hartzera gonbidatzen dituzte herritarrak.