Sorgin Jaiak azalberritze asmotan da

jon-altuna-egitegi 2013ko otsailaren 23a

Sorgin Jaiek funtzionatzeko modua iraultzeko asmoa agertu dute gaur goizean egindako agerraldian. Orain arte festa alternatiboak antolatzeko helburuarekin gazte talde bat biltzen zen eta programa talde txiki honen labean egosi eta gero, koadrilaz koadrila joan ohi ziren ekintza bakoitza egiteko prest nor egongo zen galdetu eta egitarauari lotutako gauzak proposatu asmoz.

Eguerdian Okendon egindako murala, koadrila ezberdinen blusekin SJ osatuz (Sorgin Jaiak).

Aurten ordea, aurrerapauso bat eman nahi dute. Antolaketaren konpromisoa herritar guztiei zabaltzea dute xede, ez dute lasarteoriatarrek Sorgin Jaiak gazte ikuspuntu soil batetik ikusterik nahi, euren leloari jarraiki ("herritik, herriarentzat") haur, heldu eta adinduak ere festaren antolakuntzan parte aktibo izatea nahi dute. "Zuk zure herriko festetan zer egin nahi duzu? Zer antolatuko zenuke gustura?" bezalako galderei erantzun eta ekintzak euren kabuz antola ditzaten bilatzen dute.

Hemendik aurrera, Sorgin Jaiak "koordinazio gune" bat izango da, adin talde guztietako herritarrengandik eratorritako ideia horiek komunean jarri eta elkarren artean eztabaidatzeko funtzioa izango duena. Baina ekintza bera, festetan gauzatuko den hori koadrilen esku egotea nahi dute, ekimena eurengandik sortzea, Sorgin Jaiek zer proposatuko zain egon gabe.

Beraz, herritar guztiak parte-hartzera animatu eta ostiralero arratsaldeko 18:00etan kultur-etxean biltzen direla jakinarazi dute. Batzarrak irekiak izanik, edozein herritarrentzat ateak zabalik dituztela gogorarazi nahi izan dute.