PSEk Okendoko aparkalekuak banatzeko zozketa eskatuko du

jon-altuna-iza 2013ko martxoaren 8a
Deskargatu Info Ahotsak :
Español English Français Català Galego

Okendo, Tajamar eta Bekoerrotako aparkalekuak banatzeko irizpideak onartu zituen aurreko astelehenean Udalak eta PSEk zuzenketa orokorra aurkeztuko duela jakinarazi du gaur Jesus Zaballosek prentsaren aurrean. Alderdi hori ez dago ados garajeak adjudikatzeko moduarekin, hau da, eskaera egiten dutenek irizpide batzuen arabera jasoko dituzten puntuen arabera banatzearekin, eta derrigorrezko betebehar batzuk jartzea proposatuko du.

Jesus Zaballos, PSEren egoitzan, prentsaurrekoan.
Jesus Zaballosek gaur goizean adierazi duenez, zozketa aukera berdintasuna ziurtatzeko egokiagoa da. “Notario baten aurreko zozketa modu argi eta gardenagoa da, Udalak jartzen dituen gutxieneko betebeharrak betetzen dituzten interesatuek baldintza berberetan aurkezteko aukera izan dezaten”.
Gainera, hiru zozketa egiteko proposatuko du Udalak diren hiru aparkaleku ezberdinetako garajeak banatzeko: Okendon 122, Tajamar-eko biribilgune ondoan, 21, eta Bekoerrotan, Osasun etxe ondoan, beste hiru. Horrela herritar bakoitzak interesatzen zaion garajearen adjudikazio prozesuan izena emateko aukera izango du eta ez banaketa orokor batean. Zaballosen iritziz, honek Udalaren lana erraztuko luke, ez duelako inork interesatzen ez zaiona eman zaiolako uko egingo.
PSEk aurkeztuko duen zuzenketaren arabera, derrigorrez bete beharreko zenbait baldintza jarriko dira: besteak beste, Udal Ogasunarekin zorrik ez izatea, aparkalekuaren inguruko etxe batean erroldatua egotea, eskatzaileak autoa izatea, zerga Lasarte-Orian ordaintzea eta herrian beste garajerik ez izatea.
Udalak, antzeko baldintzengatik puntuak eman eta aparkalekuak horien arabera banatzea proposatu badu ere, PSEk ez du bat egin eta derrigorrezkoak izan daitezela proposatuko du.