Tolosa eta Ibarburu txapeldunorde GIF Sarian

Buruntzaldea IKT-ko infantil, junior eta absolutu mailako igerilariak maiatzaren 4an Anoetako igerileku luzean izan ziren Gipuzkoako Federazioaren Udarako bigarren sarian parte hartzen. Eta taldeko bi igerilari txapeldunorde izan ziren bigarren sari honetan, Itsaso Tolosa maila absolutuan eta Iñigo Ibarburu infantil mailan.

Borja Apeztegia entrenatzaileak adierazi digunez, “gure igerilari gehienek markak hobetu zituzten”. Gainera, lehen urteko infantilentzat lehen aldia zen igerileku luzean eta “bikain aritu ziren” azpimarratu du.
Zilarrezko postua

Buruntzaldea IKT-ko entrenatzaileak azaldu digunez sari honetan igerilari bakoitzak bi probatan parte hartu zuen eta horietan lortutako puntuen arabera, sailkapena orokorra egiten zen.

Honela, Itsaso Tolosak abslutu mailan 50 m. eta 100 m. bizkar probetan egindako markei esker lortu zuen txapeldunordetza.

Iñigo Ibarburuk berriz, 400 m. libre eta 50 m. libre probetan irabazi eta gero, bigarren postua lortu zuen infantilen artean. Gainera, Ibarburuk bere marka 4 segundotan hobetzea lortu zuen 400 m. libre proban eta Espainiako gutxienekotik 4 segundora geratu zen.

Markak hobetzen

Honetaz gain, hainbat igerilarik haien markak hobetu zituzten.

Aipatzekoa da, Ainara Garciak 100 bular proban egindako marka. Bere aurreko denbora 7 segundotan hobetu zuen eta “Infantil mailako Espainiako Udarako Txapelketarako gutxieneko markara asko gerturatu zen, segundo eta erdira geratuz”.