Kamiseta berdeak soinean jarrita, marea berdeak dantza eta koreografia artean egin zuen ordubete inguru iraun zuen desfilea.
Behin Okendo Plazara iritsita, desfilearen bide osoa egin zuen Pirritx eta Porrotxen kamioia eskenatoki aurrean aparkatu eta Maider Oiartzabal Kukuka dantza eta antzerki eskolako irakaslearen esanei jarraituz, hiru koreografia dantzatu zituzten, tartean eskolako ereserkia.
Argazki politak ikusi ahal izan ziren plazan, txikitxoenetatik hasita helduen taldekoetaraino denek irribarre zabala zeukaten ahoan eta nabari zen gozatzen ari zirela.
Marea Berdearen ARGAZKI GALERIA
Hamaikagarrenez
Aurtengoan XI. edizioa du Kukukak antolatzen duen dantza eta antzerki asteak. Ekainaren 5etik hasita hilaren 15era arte herritarrek Kukukakoen aldakak mugitu eta inprobisatzeko duten abileziaz gozatzeko aukera izango dute Manuel Lekuona kultur-etxean egingo dituzten emanaldien bitartez.
Urte guztian zehar egindako lana islatuko da bertan eta bi aste bete-beteak izango direla uste dute antolatzaileek.