Eduki hau partekatzeko esteka arbelera kopiatu da.
Aurten XXV. urteurrena bete du Dantzari Txiki Egunak. Eguraldi bikaina lagun, sei talde aritu dira Erketzekin batera herriko kaleak alaituz, Faltzesko Makaia, Urretxuko Lurra D.T., Errenteriako Ereintza D.T., Andoaingo Urki dantza taldea eta Lasarte-Oriako Kukuka antzerki eta dantza eskolako txikiak izan dituzte Erketzekoek alboan egun berezi honetan.
Guztien artean giro ezinhobea sortu dute, igande goizean herriko plaza ezberdinetan aritu dira dantzan, eguerdian sabelak bete dituzte herriko lau elkartetan eta arratsaldean Okendon emanaldi ederra eskaini dute. Makil dantza, Arku dantza, Inauteriak, Itsas dantza, Sardineras... Denetariko euskal dantza tradizionalez gozatzeko aukera izan zuten herritarrek igandean. Guztira 150 bat ume aritu ziren gorputzak astintzen gara bateko soineko, alpargata eta jantzi koloretsuz apainduta.
Balorazioa eta eskerrak Antolatzaileak gustura mintzo ziren igande arratsaldean, taldeak laguntzaileak eta publikoa “ezinhobeto” aritu zela adierazi zuten eta bereziki eskerrak eman nahi izan zizkieten Saustatxo, Xirimiri, Semblante Andaluz eta Arrieskal elkarteei emandako tratu eta laguntzagatik eta baita Udalari ere.
