Arratsaldeko seietan Ttakunek urtero antolatzen duen sagardo dastatzea hasi da Okendon. Postu ezberdinetan banatuta herritarrek Lasarte-Oriako sagardoak dastatu ahal izan dituzte. Plazan ere, Jon tratamendu behar duen herriko haurraren aldeko pintxo postua egon da eta bertan salgai txistorra eta tortilla pintxoak, sagardoarekin laguntzeko primerakoak.
Oholtzatik berriz, erromeriako dantzak gidatzen aritu dira Maider Oiartzabal eta Dabid Egizabal. Herritar asko animatu da dantzara eta giro polita sortu dute. Hainbat euskal dantzarekin batera, munduko beste doinu batzuk dantzatzera ere ausartu dira. Plaza erdian, haur, gazte zein heldu eskutik helduta dantzan ikusi ahal izan ditugu.
Elizatze plazan bitartean, Ellas Bailan Solas antzerkia ikusteko aukera izan da. Antonia eta Regina amonak zahar egoitzatik ihes egin dute eta egoitzako langileek ez aurkitzeko egiten dituztenaz gozatu ahal izan da. Ikusle andana hurbildu da eta irribarrea izan da nagusi.
Andatza plazan berriz Indiara egin da salto eta Bollywoodeko dantzak ikusteaz gain, hauek egin ahal izan dira Raat Ki Rani taldearen esku. Sentsualitatez betetako dantzak ikusi dira.