Ostirala, maiatzak 17

09:00

XVI. Udaltop, bigarren eguna

Nola erakarri etorri berriak euskarara? Eta, euskaldunok, nola hurbildu etorri berrietara? izenburupean, oinarri teorikoak, ikerketak eta praktika onak bilduko dituzte XVI. Udaltop Udaletako Euskara Zerbitzuen Topaketan, etorri berrien harreran fokua jarrita.

19:00

Lierni Rekondo herritarra, Gipuzkoa Bertsotan fasean

Udazkenean jokatuko dute Gipuzkoako Bertsolari Txapelketa. Ziurra da data baina ez nortzuk parte hartuko duten, izan ere, hilaren 25ean hasi eta ekainaren 2an amaituko den sailkapen fase bat aurrera eramaten ari dira hori erabakitzeko: Gipuzkoa Bertsotan. Gauzak horrela, 74 bertsolari ariko dira koplaka hogei saiotan, bi itzulitara. Bigarren errondara 48 pertsona sailkatuko dira eta horietatik 34k poltsikoratuko dute udazkeneko hitzordu handirako txartela. Partaideetako bat izango da Lierni Rekondo lasarteoriatarra. Herritarra B multzoan dago eta Oñatiko Santa Ana antzokiko saioan parte hartuko du hilaren 17an, ostiralarekin, 19:00etatik aurrera. Beste bost bertsolarirekin batera ariko da: Aimar Sorazu, Andoni Rekondo, June Aiestaran, Maddi Aiestaran eta Maide Garmendia. 

19:30

LGTBIQ+ fobiaren aurkako nazioarteko egunean, manifestazioa eta kontzertua

Buruntzaldeko transmaribibolloek nabarmendu dute "borroka eta salaketa eguna" izango dela hilaren 17a, LGTBIQ+ fobien aurkako nazioarteko eguna. Gauzak horrela, Erasoen aurrean erresistentzia transmaribibolloa lelopean manifestazio bat egingo dute, Hernaniko Plaza Berrian hasita. 19:30ean jarri dute hitzordua. Ekintza hori amaitzean Elektropottotte elektrotxarangak girotuko ditu kaleak.