Ospakizunetan ibili dira Ostadar Inklusioan, eta ez da gutxiagorako. Lehen urtemuga bete du taldeak, eta udaleko, Ostadarreko, Gipuzkoako Kirol Egokituko Federazioko eta Michelin eta IKT4 babesleen ordezkariak gerturatu dira taldekideak zoriontzera.
Amaia Cadarso eta Jurgi Olasagasti entrenatzaileek orain urtebete baino gehiago jarri zituzten proiektu horren zimenduak, eta dagoeneko ematen ari da fruituak. Eskuadeko neska-mutil orori kirola egiteko aukera eskaintzea ez baita gutxi. "Inklusioa bizitzako alor guztietara eraman behar dugu, eta zuek erakutsi duzue posible dela", adierazi die Jesus Zaballos alkateak.
Jendaurrean entrenamendua egin dute Ostadarreko kirolariek, eta saskibaloi partida batean erakutsi dute aulkiarekin duten abilezia. Ongi amaitu dute denek urtemuga, mahai baten inguruan askaria eginez.