Estreinako jardunaldian Uribealdearen aurka 17-13 galdu ostean, Phil Huxford eta Facundo Oriveren jokalariak are gogo gehiagorekin irten ziren garaipenaren bila Zarauzko Asti zelaira. Ander eta Xabier Rekondo anaiek eta David Vegak hasieratik jokatu zuten; Julen Aristorena bigarren zatian zelairatu zen.
Kanpoko taldeak, Real Oviedok, erakutsi zuen ez zela etorri arratsalde-pasa, eta gauzak oso zail jarri zizkien zarauztarrei. Pentsa: Babyauto Zarautzek neurketaren hondarrean lortu zuen garaipena, Corey Simpson-ek gauzatutako transformazio bati esker. Azkenean, 23-21ekoa izan zen markagailua, eta puntuak Zarautzen geratu ziren.