Intza Fernandez: "Gogoko dut olatuekin arraun egitea; hasteko irrikaz nengoen"
Ziabogan izandako arazoak gorabehera, gustura dago Fernandez Kontxako Banderako emaitzarekin. Onartu du Donostiarraren lehen urtea "gogorra" izan dela

Arraunlari gaztea da Intza Fernandez (Lasarte-Oria, 1996), baina dagoeneko bi Kontxako Banderetan lehiatu da. Ez da lehiaketa garrantzitsuagorik arraunean, eta uneaz gozatu du Fernandezek. Gainera, ahazteko zaila izango du Kontxan jokatuko bigarren txanda, olatu dantza baten erdian arraun egin baitzuen Donostiarra traineruan.     

Berezia izan behar du Kontxako Banderan lehiatzea, ezta? Bitan egin duzu dagoeneko. Zer sentsazio eragiten du horrelako estropada batean aritzeak?  

Oso desberdina da. Gure estropadetara jende gutxi joan ohi da ikustera. Baina Kontxakoa izugarria da, gertutik nabaritzen duzu jendearen babesa. Denboraldia amaitzen dugu Kontxan, eta sari baten antzekoa da. Urte osoa gaude Kontxako Banderari itxaroten. 

Aurtengo estropada denbora luzez gogoratuko da, batez ere, bigarren txandan izandako itsaso zakarragatik.  

Niri gustatzen zait horrelako itsasoarekin arraun egitea. Beldurrik ez nuen, irrikaz negoen estropada jokatzeko. 

Proba bertan behera uzteko zorian egon ziren. Urduritasun uneak izango ziren haiek, ezta?

Bai, baina ni nahiko seguru nengoen jokatuko zela. Ez zitzaidan burutik pasa bertan behera utziko zutela. 

Zure ustez, ongi egin al zuten proba bertan behera ez uzten? 

Nire ustez, bai. Itsasoa arriskutsua zegoen, baina segurtasun neurri asko hartu zituzten. Traineru bakoitzaren atzetik sorosleak zihoazen, txalupa batean. Trainerua iraultzea oso zaila da, baina arriskutsua da patroiarentzako, zaila duelako orekari eustea. Gogorragoa ere bada estropada, ziabogara iristea gehiago kostatzen du. 

Baten batzuk kexatu ziren itsasoa arriskutsuegia zegoela eta. 

Iaz jokatu genuen estropada bat horrelako baldintzetan, Zumaian. Gainera, bandera irabazi genuen.  

Ziabogan arazo batzuk izan zenituzten joan den igandean.   

Ziaboga iritsi aurretik, barrutik ematera gindoazen. Urduritasunagatik edo, patroiak ez zituen aginduak behar bezala eman: ababorrak tiratzeko esan zuen, baina istriborrak tiratu behar zuen. Geldi egon ginen, eta kanpora atera behar izan genuen. Gainera, aurrekoari  [ziabogan bira ematen laguntzen dionari] arrauna hautsi zitzaion. Zabalegia egin genuen ziaboga. 

Horrelako itsasoarekin, ezinbestekoa izango da patroiaren eta arraunlarien arteko erabateko koordinazioa.   

Bai, eta aurreko arraunlariak lagundu egin behar dio, trainerua gehiegi ez desbideratzeko. 

Zer moldaketa egin behar zaizkio traineruari itsaso txarrarekin aritzeko?  

Palka handiago bat jarri behar izan genion, ur gutxiago sartzeko brankatik. Gero, seigarren postuko bi arraunlariak gerrikoarekin lotuta joan ziren. Aldeetatik ere babesak jarri genituen, ur gutxiago sartzeko, eta, ur-ponpak, ura ateratzeko. 

Azkenean, zazpigarren geratu zarete. Gustura al zaudete emaitzarekin?

Balorazioa ona da. Kontuan edukita ziabogan eduki genuen geldialdi hori, ez da postu txarra. Gustatuko zitzaigukeen bosgarren-edo sailkatzea, baina baldintzak ez dira eman. 

Gasteizen ikasten duzu. Nola uztartzen dituzu ikasketak eta entrenamenduak? 

Elikagaien Zientzia eta Teknologia ari naiz ikasten. Neguan entrenamendu fisikoak izan ohi dira, gimnasioan egitekoak. Bakoitzak bere kontura entrenatzen du, eta nik entrenatzaileak bidaltzen dizkidan entrenamenduak egiten ditut. Gero, asteburuan ateratzen naiz uretara taldekideekin. Udaberri aldean ostegunetan saiatzen naiz itzultzen, eta soilik bi entrenamendu galtzen ditut. Gimnasioan egiten dut haiek uretan egiten dutena. 

Entrenamendu batzuetara huts eginda ere, arraunlari finkoa zara traineruan.  

Bai, eskarmentu handienetarikoa duen arraunlaria naiz. Normala da finkoa izatea. 

Aurten seigarren urtea duzu arraunean. Zerk bultzatu zintuen paladak ematera?   

Kontxako estropadak ikusten ari nintzen, eta bat-batean okurritu zitzaidan. Beste kirolak ez zaizkit gustatzen, eta proba egitea erabaki nuen. 

Zer da arraunetik gehien gustatzen zaizuna? Zerk erakartzen zaitu?    

Inoiz ez da guztiz ikasten ondo arraun egitea. Beti dago zerbait hobetzeko. Horrek behartu egiten zaitu zure buruari gehiago eskatzera, eta harrapatu egiten zaitu horrek. 

Getaria-Zarautz taldean ibili zinen iaz, taldea desagertu zen arte. Une zailak izan al ziren haiek?   

Bai, zeren bloke indartsua egin genuen, eta pena izan zen taldea uztea, emaitza gero eta hobeak lortzen ari baiginen. Baina gero erraza egin zitzaidan taldea aurkitzea, Donostiarrak emakumeen taldea atera nahi zuelako. 

Traineru berria da Donostiarrarena. Nolako urtea izan da?    

Nahiko gogorra. Azkenean lortu dugu nahiko maila ona erakustea, baina ez da erraza izan. Jendeak ez zuen esperientzia handirik, eta lanak izan ditugu entrenatzeko trainerua osatzeko. Halere, espero genuena baino maila hobea eman dugu.

Gainera, emakumeen trainerua dela eta, giroa gaiztotu da Donostiako taldeen artean. 

Saiatu gara albo batera geratzen, eta kasu gehiegirik ez egiten polemikari. Saiatu naiz horretaz ez hitz egiten, baina azkenerako erreta amaitu dut. Kanpotik asko astindu gaituzte.  

Hurrengo urteari begira, zer helburu dituzu?    

Arraunean jarraituko dut, baina ez dakit non. Getaria-Zarautz utzi nuenean, banuen buruan maila altuagoko traineru batean hastea. Jakin arren zaila izango dela postua irabaztea, gustatuko litzaidake lehia horretan sartzea, gehiago ikasteko. 

 

ARGAZKIAK
blog comments powered by Disqus
OHARRAK
  • Yoko-Garbi elkartearen bazkide kanpaina
    Zubietako YOKO-GARBI elkartean, bazkide izateko azken tokiak geratzen direla jakitera ematen du. Familia bonoak, jubilatuei deskontu bereziak, etab. daude. Elkartearen egoitza berria, Alamandegi etxean izango da Izena ematea Alamangi jatetxean edo yokogarbielkartea1@gmail.com helbidean egin behar da, urriaren 14-a baino lehen. Informazio edo azalpen gehiago behar izanez gero, yokogarbielkartea1@gmail.com helbidean eskainiko dira.
  • Erketzen urteurren bazkaria
    Erketz EDT urriaren 21ean bere 50. urteurreneko bazkaria antolatu du, Michelin kirol guneko pilotalekuan. Bazkari gozoa dastatzeko txartelak salgai daude Patricio tabernan, Mendi-Rock tabernan eta Ormazabal lora-dendan. Haurren bazkariko txartelak, 15 euro balio ditu; helduenak berriz, 35 euro. Urriaren 5era arte izango dira eskuragarri.
  • Adineko pertsonen omenaldiko bazkaria
    Adineko pertsonen omenaldi astearen barruan, urriaren 7an, igandea, bazkaria antolatu dute Michelingo Kirol gunean. 500 pertsonentzako lekua dago. Irailaren 5ean, asteazkenean, irekiko da txartelak eskuratzeko epea eta irailaren 25ean amaituko da. Biyak Bat elkarteko bulegoan goizez 10:30etik 12:30era egingo da banaketa eta 8 euro balio dituzte. Antolatzaileek eskudirutan ordaindu behar dela gogorarazten dute. Bazkariaz gozatu ahal izateko baldintzak Lasarte-Orian erroldatua egotea eta 1953 urtean edo lehenago jaioa izatea dira. Salbuespen dira 1953 urtearen ondoren jaiotako bikotekideak. Lasarte-Orian erroldatuak ez badaude, gainera, 29,15 euro ordaindu beharko dituzte.
  • Kiroldegiko neguko ordutegia
    Herriko kirol instalazioetan neguko ordutegia indarrean dago irailaren 1etik. Kiroldegia astelehenetik ostiralera 7:00etatik 22:30era egongo da irekia. Larunbatetan, 9:00etan irekiko ditu ateak eta 20:00etan itxi eta igandetan berriz, goizez soilik erabili ahalko dira instalazioak 9:00etatik 13:00etara. Kirol Guneko erabilera ordutegia astelehenetik ostiralera 15:30etatik 22:30era da. Larunbatetan goiz eta arratsaldez egongo da irekia, 9:00etatik 20:00etara eta igandetan kiroldegiaren antzera, goizez 9:00etatik 13:00etara.
Lasarte-Oria
Gaur ez dago ekitaldirik Lasarte-Orian.
ZORION AGURRAK
IÑAKI
Zorionak!! Zure urtebetetzeko ospakizunak eta gero, ezkontzarako indarrak izatea espero dugu!! Ongi pasa!! Ttakuneko lankideak
AZKEN PDFa
1434 ( Irailak 21 )
GUARDIAKO FARMAZIAK
Urbistondo ( Asteartea)
San Frantzisko 1
Tel: 943 366567
ASTEA
    • Gandarias-Uribe ( Asteazkena )
      Iñigo de Loyola 9
      943 019521
    • Orue ( Osteguna )
      Jaizkibel plaza 2
      943 362652
    • De Miguel ( Ostirala )
      Kale Nagusia 32
      943 371151
    • Gandarias-Uribe ( Larunbata )
      Iñigo de Loyola 9
      943 019521
    • Gandarias-Uribe ( Igandea )
      Iñigo de Loyola 9
      943 019521
    • Lasa ( Astelehena )
      Kale Nagusia 42 atzea
      943 361774
    txintxarri@txintxarri.eus
    txintxarri@ttakun.eus
    Geltoki kalea 4, Lasarte-Oria 20160 Gipuzkoa
    943 37 14 48