2018 urteko ordenantzak onartu dira
2018 urteko ordenantza fiskalak behin behinekoz onartu ditu Udalbatzarrak. Emendakinak aztertu dira eta PSE-EEk EHBilduri proposatutako bi transakzio-emendakin bakarrik onartu dira. Ez da aldaketa nabarmenik egon eta nagusiki %1,2ko igoera izango dute tasa eta zergek. Batzarraren ostean, Jesus Zaballos alkateak ordenantzetan emandako aldaketa eta berrikuntzak azaldu ditu.

Pozik agertu da Jesus Zaballos Lasarte-Oriako alkatea ordenantza fiskalak onartu direlako. “Beste alderdiek ez dituzte atzera bota”, aipatu du. PSE-EEren aldeko botoek ahalbideratu dute onarpena. EHBildu, Lasarte-Oriak Ahal du eta EAJ abstenitu egin dira eta PPk aurka bozkatu du.

Jesus Zaballos alkateak nabarmendu lez, “azken urteetan bezala Espainiako Aurrezki Kutxen Fundazioak, Funcasek  proposatutakoarekin bat egiten dugu, KPIa igo”. Era honetara, orokorrean 2018 urteko tasak %1,20a igoko dira. Salbuespenak zabor tasa, higiezinen gainbalioa eta kiroldegiko abonuen tasa dira.

Zabor tasak %5aren igoera izango du 2018an. “San Markos Mankomunitatearen erabakiaren ondorio da igoera hori. Atez ateko sistema duten herriek helegitea jarri zuten behar ez zuten zerbitzu bat ordaintzen zutelako. Epaitegiek arrazoi eman eta zerbitzu horren kostea beste herriei gehitu digu San Markosek. Hori horrela izanik eta udalak zaborren gastuen estaldura maila mantendu nahi duenez, tasa igo da.”

Higiezinen gainbalioa, berriz, %4a igoko da. Alkateak azaldutakoaren arabera, “Aldundiak gehiengoa %15an du ezarria. Hainbat  herriekin konparatua baxua du Lasarte-Oriak”.

Kiroldegiko abonuei dagokionez, Buruntzaldeko Mankomunitateko Kirol zerbitzuek adostutako tasa ezarriko da. Abonu familiarrak %1,67ko igoera izango du, helduen abonuak %1,20 eta haurrenak %2a. 

Berrikuntzak

Alkatearen hitzetan, 2018 urteko ordenantzetan “berrikuntza txikiak ere” badaude.

Hauek Udalbatzarrean onartu diren bi transakzio-emendakin, Gizarte Zerbitzuetan sortuko diren zerbitzu berrien tasak eta tutoretzapeko pisuen egoiliarrentzako edo familia ugarientzako hobarien irizpideetako aldaketak dira.

Alkateak azaldu moduan, Gizarte Zerbitzuek urtarriletik aurrera mendekotasunik ez duten pertsona adinduentzako jangela zerbitzua eta jarduerak dituen eguneko zentroa jarri behar ditu martxan Biyak Bat elkartean eta horien tasak zehaztu dira.

Bestetik, tutoretzapeko pisuetan bizi diren pertsona adinduek gutxienez 6 hilabetez egon beharko dute erroldatuak hobariak jasotzeko.

Familia ugarien kasuan, “Hirukide Familia ugarien elkartearekin bildu ostean, irizpideei mugak aldatzea erabaki zen”. Honela familia ugariek higiezinen tasako hobariak jasoko dituzte etxearen balio katastrala 182.000 euro baino gutxiagokoa bada eta ibilgailuen gaineko zergan, zaldi potentzia fiskala 15,99a baino gutxiagokoa bada.

Udalbatzarra

Hala ere, udalbatzarrean ez dira gai hauek guztiak jorratu. Ogasun Batzordean landu eta bertan onartu ez ziren emendakinak izan dira aztergai.

EHBildu eta PPk ordenantzen emendakin partziala egin dute eta biak atzera bota ditu Udalbatzarrak.

Ostean, EHBilduren zortzi emendakin, Lasarte-Oriak Ahal du alderdiaren eta EAJren emendakin bana eta EHBilduk eta Lasarte-Oriak Ahal duk aurkeztutako transakzio-emendakina izan dira mahai gainean. Besteak beste, Aire Garbiak 5. edukiontziaren erabiltzaileei  hobariak ezartzeko aurkeztutako proposamena, familia ugarietako guraso bananduentzako higiezinen tasan hobariak edo etxebizitza hutsen tasa igotzea. Azken bi gai hauek izan dira transakzio-emendakin bidez onartu direnak.

Honela, familia ugaria duten guraso bananduek, %50eko hobaria izango dute beti ere, zaintza partekatua bada eta haurrak etxebizitza batetik bestera badabiltza.

Bestalde, etxebizitza hutsa duten herritarrek, Alokabideren Bizigune programan parte hartzea adostu eta hitzarmena eginez gero, %50ko hobaria izango dute.

Lanketa eza

Honez gain, EAJ orokorrean bat etorri da ordenantza fiskaletan eman den igoerarekin. Baina berrikuntzarik ez egotea aurpegiratu dio Gobernuari, baita lanketa eza ere. “Aurre lanketarik ez da egon eta atzerapausoa iruditzen zaigu hori. Zenbait tasek lanketa propioa behar dutela uste dugu, hala nola, zaborren edo uraren tasa. Saiakerak egin dira tasa horiei irizpide egokiagoak ezartzeko. Berrikuspen sakonagoa behar dute”.

Lasarte-Oriak Ahal du alderdiak ere ordenantzak aztertzeko epea motzari buruzko kritika egin du bere mintzaldi txanda batean, “zortzi egun besterik ez ditugu izan eta berriro ere, ordenantza fiskalak lantzeko mahaia martxan jartzea eskertuko genuke”.

Alkateak egindako agerraldian lanketa mahairik ez dela egon eta epe labur batean guztia egin dela onartu du. “Abenduaren 31erako ordenantzak onartuak egon behar dute, beraz, egutegiaren arabera egin dugu lan. Zortzi egun bakarrik izan dituzte alderdiek ordenantzak aztertu eta haien emendakinak egiteko. Orain behin behinekoz onartu ditugu. GAOn argitaratu eta hilabetez alegazioak egiteko aukera izango da. Alegaziorik egon ezean, behin betikoz onartuko dira. Baina alegaziorik badago, beste hamabost egun beharko dira”.

Hala ere, lanketarik ez egitea egotzi die beste alderdiei eta hurrengo urterako ordenantzetan lan egiteko gomendioa egin die, “KPIa berriro ere igotzea izango da gure proposamena”.

Hala ere, PPren, EAJren eta EHBilduren ordenantza fiskalei buruzko jarrera gaitzetsi du.

“PPko zinegotzia ez da batzordeetara agertu eta emendakin partziala egin du. Bere azalpenean krisia eta langabezia tasa aipatzen ditu tasak izozteko argudio bezala, bere alderdia Gobernuan egonda larria iruditzen zait hori aipatzea, izan ere, egoera hobera doala dio Gobernuak,” adierazi du.

Bestetik EAJ eta EHBilduren koherentzia falta salatu du. “Haiek gobernuan zeudenean tasak KPIren arabera edo higiezinen gainbalioa %4a igo zuten eta orain izoztea edo KPIa bakarrik ezartzea eskatzen dute”.

EHBilduren kasuan gainera, aurreko urteko emendakinak errepikatzea leporatu dio.

ARGAZKIAK
blog comments powered by Disqus
OHARRAK
  • Intza elkartearen Batzar Orokorra
    Intza elkarteak jakinarazten du, otsailaren 4an, igandean ohiko eta ez-ohiko batzar orokorrak antolatu dituela. Lehen deialdia 09:00etan da eta bigarrena berriz, 09:30ean. Elkarteak bazkide guztiei deia egiten die batzarrera hurbiltzeko.
  • Eskalada doan, Pio Barojan
    Lasarte-Oriako Udal Kirol Zerbitzuak eskaladan hasteko saio berezia antolatu du 2006, 2007, 2008 eta 2009an jaiotako neska-mutilentzat. Jardunaldia urtarrilaren 27an egingo da, arratsaldeko 16:00etan, Donostiako Pio Baroja kiroldegian. Interesa duten pertsonek Maialen Chourraut kiroldegian eman beharko dute beraien izena. Plaza kopurua mugatua denez, izen-emate zerrenda errespetatuko da. Jarduera doan izango da udal kirol instalazioen bazkideentzat.
  • Mus txapelketa
    Euskal Herriko X. Mus Txapelketako Lasarte-Oriako fasea jokatuko da urtarrilaren 26an, Xirimiri elkartean. Egun horretan bertan, elkartera izen ematera gerturatzen direnek momentuan jokatuko dute kanporaketa, eta bertan irabazle suertatzen direnek Gipuzkoako txapelketarako pasea lortuko dute. 20 euroko kostua (bikoteko) izango du izen emateak.
  • Biyak Bat elkartearen batzar orokorra
    Biyak Bat elkarteak jakinarazten du, urtarrilaren 27an, larunbata 2017 urteari dagokion batzar orokorra egingo duela. Lehen deialdia 17:30ean da eta bigarrena berriz, 18:00etan. Elkarteak bazkide guztiei deia egiten die batzarrera hurbiltzeko elkartearen egoeren berri izan dezaten.
  • Odol ateratzea
    Hilabeteko azken astelehenean, urtarrilaren 29an, eman ahal izango da odola Osasun Zentroan, 17:30etik 20:30era. Anima zaitezte, odola ordezkaezina da eta odol falta dago!
Lasarte-Oria
Gaur ez dago ekitaldirik Lasarte-Orian.
ZORION AGURRAK
IRATI
Zorionak maitia zure urtebetetzean!! Ondo pasa eta 9 muxu goxo!!
AZKEN PDFa
1407 ( Urtarrilak 19 )
GUARDIAKO FARMAZIAK
Gandarias-Uribe ( Asteazkena)
IƱigo de Loyola 9
Tel: 943 019521
ASTEA
    • Orue ( Osteguna )
      Jaizkibel plaza 2
      943 362652
    • De Miguel ( Ostirala )
      Kale Nagusia 32
      943 371151
    • Orue ( Larunbata )
      Jaizkibel plaza 2
      943 362652
    • Orue ( Igandea )
      Jaizkibel plaza 2
      943 362652
    • Lasa ( Astelehena )
      Kale Nagusia 42 atzea
      943 361774
    • Gil ( Asteartea )
      Kale Nagusia 24
      943 361529
    txintxarri@txintxarri.eus
    txintxarri@ttakun.eus
    Geltoki kalea 4, Lasarte-Oria 20160 Gipuzkoa
    943 37 14 48