Gaur bertan, bezperan ekingo diete Basaundiko auzotarrek San Inazio eguneko ospakizunei. Plazan tailer desberdinak antolatu dituzte haurrentzat hemendik ordu erdi barru, 18:00etan. 20:00etan berriz, musika-jarduerari ekingo diote plaza horretan bertan.
Hamaika ekintza bihar
Gaurko egunean zehar motorrak berotu ostean, biharko egun handirako prestatuko dira Basaundiko auzotarrak. Goizean goiz hasiko da egitarauko lehen ekitaldia: martxa erregulatua irtengo da 9:00etan Basaundiko plazatik. Handik ordubetera hasiko da galeper-botatzea, Buruntz-azpi elkartearen eskutik. 11:00etan berriz, haurrek primeran pasatzeko aukera edukiko dute Plaza Berri frontoian, antolatzaileek hainbat jolas eta jarduera prestatu baitituzte. Ordu horretan bertan buruhandiak plaza eta inguruko bazterrak nahasten hasiko dira. 11:30ean berriz, Karmengo Kaperan meza nagusia ospatuko dute. 12:30ean amaituko dira bihar goizeko ekitaldiak, bote eta toka txapelketarekin. Ekintza hori ere plazan izango da.
Goizeko jardueren ostean indarrak berreskuratu eta arratsaldekoei ekin aurretik, Oria-Txiki jatetxean bazkari herrikoia egingo dute auzotarrek. Tiketak erosi nahi dituenak Oria-Txikin bertan erosi ahalko ditu bihar.
Gaztetxoek Basaundi plazan edukiko dute hitzordua 17:00etan: gaztelu puzgarriak jarriko dituzte antolatzaileek. Saltoka eta jolasean aritu ostean, meriendatu egingo dute 17:30ean. Kirolak ere izango du tarterik egitarauan: 18:00etan binakako pala txapelketa herrikoia hasiko da Plaza Berri pilotalekuan. Bien bitartean, ezkondutakoek ezkongabeen aurkako futbol norgehiagoka jokatuko dute frontoi alboko futbol-sala kantxan, 18:30ean. 19:00etarako berriz, apar festa antolatu dute tenis pistan. Handik ordu erdira hasiko da Zero Sette akordeoi orkestraren emanaldia Basaundi plazan.
Gauean berriz, gorputzak astintzeko unea izango da: Ibai Berriak taldearen eskutik gogotik egingo dute dantza herritarrek, Brunet-Enean.
Ospakizunen antolatzaileek herritarrak gonbidatzen dituzte Basaundira joan, ekintza horietan parte hartu eta San Inazio eguna ospatzera.