Kalteberatasun egoeran dauden Lasarte-Oriako 323 pertsonek osatutako 119 familiak 7397 kilo janari jaso dituzte, herriko Udalak eta Gurutze Gorriak elkarlanean egindako urteko lehen janari banaketan. Pertsona beharstuei laguntzeko Europako Funtsarekin kudeatu dituzte elikagaiak.
Bi adin tarteko pertsonek jaso dituzte elikagaiak; batetik, bi urte baino gutxiago dituzten haurrentzako zerealak, esne-hautsa eta haurrentzako potoak eman dizkiete familiei. Adin horretatik gorakoentzat, berriz, oliba-olioa, babarrunak, arroz zuria, atun kontserbak, berdura krema, fruta kontserbak, gailetak, garbantzuak, leka kontserbak, esne osoa eta kontserbako tomate frijitua.
Janari banaketaren onuradun izateko baldintzak
Aurtengo lehen banaketako 119 familiak aldez aurretik gizarte-langileek baloratu zituzten, banaketarako erabilitako bi irizpideak berresteko; lehenik, Udaleko tasen eta prezio publikoen salbuespen eta hobarien zerrendan sartuta egotea; eta bigarrenik, aldeko txosten sozial bat izatea.
Hurrengo janari banaketan onuradun izan nahi duten familiek eskaera egin dezakete Udaleko erregistro orokorrean, eskaera orri orokorra betez.