Larunbat arratsalde baterako planak hamaika izan daitezke. Herriko hainbat gaztetxok eta euren senide zein lagunek 'Kaput' antzerkia ikustearen aldeko hautua egin dute. Eta, kultur etxeko auditorioan ordubetez entzun ahal izan denez, ez da izan aukera txarra: ikusleen barre-algarak etengabeak izan dira. Ederki gozatu dute emanaldiko bi protagonista zoroen gorabeherekin.
Durango&Cia konpainiak taularatu du Kaput. Komediaren bitartez lantzen du gerren drama eta horrek dakartzan albo-kalteak erakusten ditu antzezlanak, beti ere baikortasunetik behatuta eta ikusleei barre eragite aldera.