Aurreko urteetan ez bezala, Euskal Inauteriekin bukatu ez, hasi egin da festa. Lasarte-Orian dira 2017ko Inauteriak, datorren asteburura arte geratuko direnak. Goiz eta arratsalde, herriko kaleak koloreztatu dituzte gaurkoan.
Okendo plaza izan da Euskal Inauterien amaieraren gunea. Bertan erromeria jendetsua dantzatu, eta Kaxkamalo bota dute sutara, aurten ezer txarrik gerta ez dadin Lasarte-Orian. Hartza harrapatzen ere saiatu dira txantxoak, baina alde egin du aurten.
Zubietarrekin senidetzen
Arratsaldeko lauetan hasita, Zubietatik Lasarte-Oriara abiatu dira Euskal Inauteriak. Ttipi-ttapa ttipi-ttapa oinez, eta, nola ez, dantza eginez. Ttirriki-Ttarrakaren doinuek lagunduta, Hipodromoko Zubiraino kalejira koloretsua egin dute.
Zubira iritsitakoan egin dute senidetze ekitaldia bi herrietako kideek. Lasarteoriatarrek jaki eta edari ugariz betetako kutxa bat eman diete zubietarrei, eta hauek, trukean, 'Kaxkamalo' bihurria, sutan erretzeko gero. Urtean zehar izurrite eta antzeko gaitzik gure herrira ez etortzeko da baliagarri ekintza sinboliko hau. Horrela izan dadila.
Akordioa eginda, berriro ere gorputzak dantzan jartzeko unea iritsi da. Zubian bertan 'txapelua' dantzatu dute bi herriko kideek, eta herrian barrena ibili dira gero: Hipodromo Etorbidetik hasi, Kale Nagusia zeharkatu eta Okendo plazara joan dira.
Kantuan eta dantzan goizetik
Euskal Inauteriek ezin zuten bestela hasi: kantuan eta dantzan ibili dira Xumela abesbatza eta Ttirriki-Ttarrakako kideak herriko hainbat elkartetan barrena. Horrez gain, mokadutxo goxoak dastatu dituzte, giro ederrean, eguraldi bikaina lagun.
Jalgin ekin diote ibilbideari: kroketak jan dituzte bertan. Ondoren, Arrieskalletan, butifarra goxoak dastatu dituzte. Xirimirin, salda; patata tortila Ttakunenean, eta txokolate beroa eta bizkotxoak Intza elkartean. Tartean, esan bezala, euren errepertorioko abesti eta pieza ugari interpretatu dituzte.