“Juridikoki ez da sortu oraindik” argitu zuten Hernanira bertaratutako udal ordezkariek, tartean Pablo Barrio alkatea, horrekin batera azpimarratu nahi izan zuten eraketa hau ez dela posible izan “interes politiko batzuk medio, baina horiek ezin dira gizartearen interesen gainetik egon”.
Egitasmo komunak martxan daudela azpimarratu nahi izan zuten eta Hernanin zabaldutako egoitza aurrera pausu bat gehiago dela nabarmendu zuten.
Lehenengo egoitza honen aurkezpenean Lasarte-Oria, Hernani, Astigarraga, Andoain eta Usurbilgo alkateekin batera Gipuzkoako Foru Aldundiko Berrikuntza, Landa Garapena eta Turismo diputatua, Jon Peli Uriguen izan zen.
Eskualdeko langabeziari aurre egin nahi zaio, langabeziaren egoera aldatzeko estrategia eta azpiegiturak ezarriz. Honetarako hain zuzen, Innoforo eta Kooperatzen proiektuak martxan daude.
Zerbitzu eskaintza
Alde batetik, eskualdearen gaitasuna aztertu nahian, Innoforo proiektua garatu da, enplegu eta jarduera ekonomikoen sorkuntza bultzatu nahian. Bestetik, Kooperatzen proiektuak, enpresa berriak sortzeko gidaritza eskaintzen du. Agentziak eskaintzen dituen zerbitzuen artean, enplegu zerbitzua eta ekintzaile zerbitzua daude, biak ekonomia suspertu eta aberastera bideratuta.
Era berean, garapen agentzia honek tokiko enpresa, ekintzaile eta herritarrei eskainiko dizkien sei zerbitzuak azaldu ziren. Hauek enplegu-zerbitzua, ekintzaile-zerbitzua, enpresa-zerbitzua, merkataritza sustapena, turismo sustapena eta sektore berrien edo estrategikoen sustapena dira. Garapen agentziari buruzko informazioa, www.beterri.eus orrialdean aurki daiteke, beterri@beterri.eus helbide elektronikoan edo 943 25 63 47 telefonoan eskura daiteke.